呢本書轉載咗《茶杯》周刊去年一個「社區學院專訪」（轉載經鄭經翰大班同意），港大IT專家，講座教授李安國（VictorLi）以前係讀社區學院（後轉往MIT）嘅，另外訪問Motorola一位IT專家（李安國嘅社區學院同學）符俊超，符先生嘅千金入咗港大之後，轉咗去FoothillCollege，再入柏克萊，讀得好開心。呢啲途徑係證明掂嘅。但先決條件係學生一定要讀書專心，唔好到咗美國就覺得冇王管，玩到癲，咁就神仙難救。嗰邊嘅競爭亦好激烈，轉去UCLA、Berkerley尤其係好難，但其他多間加州大學分校，都水準好高啫，唔須要一定入柏克萊嘅。
前一輪，肥佬黎請食飯，見到佢兩位公子同一班親戚。肥佬黎大仔就係讀完洛杉磯某社區學院轉去UCLA嘅，肥佬笑咪咪咁話：「佢成績好好！」至於二仔因為要打籃球，唔走大佬嗰條路去美國，入咗城大，唔見佢咁多年，再見已唔認得，六呎三吋高，英俊威猛，在城大讀市場學，以佢嘅條件，喺城大直情非常之marketable。佢話城大籃球隊，打勻大學無敵手喎。