早排，孫柏文講過有隻喺德國叫做Knut嘅北極熊大熱，不過就累死咗隔籬隻熊貓。咁啱得咁蹺，祖國噚日送咗一對熊貓嚟香港，可惜香港市民對熊貓嘅來臨好似唔係好熱烈歡迎。大家可能會問：「點解北極熊就大熱，熊貓就被冷落。」上次都講過，原因就係中國政府嘅保育政策成功，穩住咗熊貓嘅繁殖率，熊貓就好似90年代嘅科技股一樣，炒完晒之後價值下降；而北極熊就好似𠵱家嘅原材料股一樣，因為全球暖化而食中個浪，被炒起。
不過，我今日想講嘅唔係IT同原材料股，其實，今日孫柏文想宣布從今開始，會不定期咁做一個「如果孫柏文係特首系列」，就當為自己未來嘅競選政綱鋪路。雖然我仲未到30歲，距離《基本法》要求嘅40歲仲爭十年多，除非中央釋法，釋到「四十歲」連我都可以做特首。