美國網球名將兼23個大滿貫女單后冠得主莎蓮娜，兩個禮拜前意外喺instagram流出大肚照，自爆有咗20個禮拜身孕，但佢之後亦大方承認「有咗」，仲話自己每個禮拜都會影一張相，紀錄肚內bb嘅成長過程咁話。

細威周一就同未婚夫、34歲嘅Reddit網站創辦人奧漢尼恩（Alex Ohanian）一齊喺紐約出席Met Gala活動，佢以一身綠色晚裝現身紅地氈，相當明艷照人，左手就不時要捧住大肚。佢亦似乎對即將做媽媽相當興奮，到埗前喺Snapchat同大家分享喜悅：「我諗今晚一定有好多有趣嘅故事，好多朋友都會喺嗰度，我好期待同佢哋見面、傾吓近況，一定會好有趣。」