各行各業都應該要有生力軍，才能保持新氣象，玄學界亦都一樣；就像今次受訪主角周亦彤（Thierry），現年32歲的她來頭絕不簡單，師承父親、著名風水大師周漢明，入行8年，擅長將時尚藝術融入風水之中。

將半邊頭髮染成金色，和另外半邊黑色頭髮形成強烈對比，是Thierry「暫時」最新造型。日前她在柴灣工作室接受《蘋果》訪問，指自己從小便熱愛藝術，喜歡設計及插畫工作，在加拿大讀書時便打算向這方面發展，與加拿大籍丈夫結婚及返港定居後，亦沒有進軍玄學界的念頭，直至機緣巧合下，發現風水不是大家想像的迷信，而是和周遭環境有莫大關係，於是決定把風水跟時尚、顏色扯上關係，就這樣便開始跟爸爸學習，開始鑽研玄學，最近更成功推出自家品牌「Go Lucky」，將時尚擺設不經意變成風水陣。

不過，玄學界有不少堪輿學家，各有「山頭」，年輕的她難免被人和「無料」畫上等號。Thierry笑謂：「都會有，始終入行年紀細，打扮同傳統師傅又唔一樣，要一步步跨過，有挑戰係正常，先會成長。試過接到啲project會突然取消，但都明白嘅，可能啲人會諗可不可信？有冇說服力？有啲人見到我着衫（風格），會問我會唔會考慮好似爸爸咁傳統啲，但係而家好多客人，搵我之前已經喺網上見過我個樣，或者係朋友介紹，嚟之前已經有心理準備，知道我外表係點。」

然而，Thierry回顧這些年，雖然經歷不同挑戰，尤其在個人修養及修行方面，但入行後接觸多了人，自己也成長得好快，視野也廣闊了許多。最有趣是老公都由不相信風水，到現每年經常都會請教其父相關問題，「佢始終係外國人，初初好唔信呢方面嘅嘢，直至有次搬咗入一個工作室好『黑』，佢先至開始相信，因為嗰個工作室，爸爸一開始就講咗一定唔可以搬入去，當時老公唔信，結果就真係『黑』得好緊要。」

Thierry和爸爸周漢明關係亦師亦友，她亦覺得父女關係好得意：「我哋會互相交流對風水睇法，爸爸知道我由細到大都鍾意設計，佢有啲客想要啲得意嘢，爸爸會叫佢哋搵我，有時爸爸又會跟埋我一齊去睇風水。」她更透露龍鳳胎哥哥現在也隨爸爸學習風水。

周漢明師傅曾言，替客人解釋風水命理，猶如一個心靈輔導師，甚至是生死判官，故傾聽和鼓勵客人都很重要，Thierry自言一向重視爸爸之言，爸爸多年來亦傳授很多這方面的經驗給她，包括面對客人的態度及說話方法。Thierry又說：「自己好注重修行，如果自己情感上、健康各方面唔好，咁係幫唔到人，一定要自己ok咗先，我通常會睇佛經、耍太極，自己越健康越好，大約4年前左右，我有段時間覺得自己氣場好唔掂，就放慢咗，休息咗一段時間先再工作。」

最近，香港人心情也快跌到谷底，作為香港人，Thierry怎會沒感受？「我不停提醒自己，心情唔好都要保持正能量，咁先可以幫到人，係好重要。」Thierry續說：「單係朋友堆之間都有好多，好多人都話心情好差，絕大部份都係因為香港嘅情況。」

2020庚子鼠年快將來臨，明年1月25日已經是大年初一，問Thierry如何看新一年的景象？一直保持正能量的她，依然滿有信心：「我一直相信暴風雨後，太陽就會出現，好相信香港會有咁情況，要有多一份希望。」Thierry又表示，香港的情況會於今年12月之後有好轉，大家可以向明年1月、2月觀望。

採訪：鄉奈仁
攝影：陳慧安
影片：廖達燊

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇