呢期韓流咁勁，個個都嚟港掘金，好似韓國人氣男團2PM嘅前隊長朴宰范（JayPark），亦都嚟咗香港，今日喺在屯門舉行簽唱會，現場有唔少粉絲捧場，不過JayPark就好明顯心情麻麻，原來佢為咗近日南韓沉船事件，搞到冇晒心機，所以佢喺活動開始前，都主動叫粉絲為海難失蹤者同家屬祈禱。

而JayPark喺活動舉行時，表現得悶悶不樂，嚟緊25號係佢牛一，有粉絲送咗兩個生日蛋糕畀佢，但係佢都冇興奮表現，佢仲直認因為海難事件，搞到佢心情好差，佢透過繙譯話：「好心痛，不過暫時未諗到到做咩，只可以祈禱，原本我連歌都唔想唱，但係見有粉絲支持先揀咗慢歌。」佢仲自爆呢排好忙，所以佢連自己嘅生日都唔記得咗。

此外，韓國星級舞師李昶勳、美國排舞師JermaineBrowne，前晚喺柴灣青年廣場出席「全民街舞2014」活動，欣賞一班年青團隊跳舞及作交流，李昶勳話都有留意香港藝人跳舞表演，佢仲話有睇過郭富城演唱會同埋城城嘅MV，佢大讚城城基礎功夫做得好好，跳舞亦都好有味道，覺得香港藝人可作多類型發展。