練馬師姚本輝這天早上，花了大量時間在沙田馬場機坪欄邊，觀看周日(18日)戰馬最後踱步備戰情況，但在空檔時，有件事他卻趕住去做，就是捉住本地騎師黎海榮密斟一輪，兩人今期獨合作第十場(尾場)二班田草1200米之「陀飛輪」，唔使問呢隻馬多數有計。

第十場退出咗隻「海翡翠」，令「陀飛輪」了少匹勁敵，雖然牠仍要面對「小巨人」、「喜悅繽紛」、「獅子驄」等惡馬，但「陀飛輪」絕非全無勝望。

今次「陀飛輪」賽前操練工夫相當辣，排5檔亦理想，而且看賽績，此駒對上兩季均曾於6月或之後贏馬，明顯是匹季尾特佳馬，今仗係「陀飛輪」踏入2017年6月後首戰，黎海榮實力座騎唔多，難得這對人馬上仗79倍入Ｑ後，黎海榮繼續獲得「陀飛輪」嘅帥權，唔搏就勢係假咯！