月底即將加價嘅港鐵又有故障，乘客嬲到震！巿民柯小姐噚日下午2點05分喺將軍澳站入閘返日出康城，當時佢坐喺月台長凳等緊列車，聽到駛往寶琳列車抵達1號月台後，有好多乘客向月台職員投訴：「有無搞錯，架車飛咗站！」佢心感不妙，問返乘客先知原來嗰班列車抵站後，幕門係有打開，不過車門竟然無開，搞到月台同車廂嘅乘客隔住塊車門玻璃「你眼望我眼」，進退不得，班車最後仲飛埋站。

車站冇廣播 職員不懂反應

柯小姐話，下班開往康城列車抵達月台後，幕門同車門開關再出現問題，今次係車門開完後，幕門唔識開，有乘客等到忟，徒手擘開門離開車廂。佢見到車門同幕門變咗人手操控，擔心出意外，問月台職員搭車會唔會出事，職員一度唔識回應，車站亦冇廣播，搞到佢唔知點算，成件事擾攘5分鐘後，職員話可進入車廂，職員以手動方式逐一閂埋車門，㗎車先順利開行。
柯小姐話喺日出康城住咗年幾，都冇見過𠵱個情況，批評港鐵服務唔達標，但票價只加不減，用轉乘優惠給予小恩小惠，表現完全唔合格，估計故障涉及機件問題，要求港鐵加強檢查，否則事故積小成多，之後出現大延誤，受害者只會係升斗巿民。
港鐵發言人解釋將軍澳站2個行車方向嘅月台幕門都出現故障，開關唔暢順，職員將每卡車其中一道幕門固定為長開狀態，手動開合，強調做法完全合乎安全規定。工程人員喺下晝2點半到場檢測，至2點50分完成修復工作，月台幕門回復正常，列車服務亦恢復。