競賽董事小組近期將尺度揸得好緊，幾乎每個賽日都有騎師被罰停賽。有關方面下個月隨時要向外班兵，以舒緩階段性的騎師供應緊張情況。
本周三（12月2日）舉行的跑馬地夜賽中，騎師共有四人停賽缺陣，計為莫雷拉、羅理雅、郭能及史卓豐。當中前者貴為萬人迷，要到周日（12月6日）沙田日馬至可以復出，難免令唔少馬主及練馬師因少咗個高手用，而牙痛咁聲。
郭能同史卓豐停完今輪各三日，待跑罷12月13日國際賽，又要展開新一輪的三日停賽。羅理雅情況亦唔好得幾多，佢下周三（12月9日）復出跑三期後，12月19日又要「入冊」，直到出年1月1日元旦至可以跑番馬。
咁樣頻密停賽法，真係人都癲！羅理雅、郭能同史卓豐變相下個月都係停多過跑，收入自然大受影響，認真弊翳。
另外，柏寶、巫斯義、田泰安、霍勵賢及吳嘉晉下個月亦會因停賽，而於個別既定日子無法上陣，屆時在高峰期內將有五、六名騎師同時停賽。