香港人有壓力，馬路上踫撞嘈大交甚至動武都屢見不鮮，但嘈到勸交變嘈交，兼吹埋雞，咁搶戲嘅配角又真係好少見喎。

網民Kenneth Lee喺「巴打絲打 Facebook Club」fb專頁上載一條短片，片段事發地點為荃灣鹹田街，房車司機同電單車司機嘈晒交仲郁手郁腳，房車乘客就負責將兩人分開。但期間有七人車疑似因為被阻去路狂響咹，嗰位負責勸交嘅乘客馬上轉而指住七人車司機「你行x開啦，x你老母」，七人車司機梗唔忿氣，即刻落車大叫「乜x嘢」。二人鬧鬧下，七人車司機更向天大叫「嘈交呀」，疑似吹雞叫人支援。原先嘈交嗰兩位主角瞬間變配角，個樣無奈到呢！

再一輪「x你老母」、「你x邊個老母呀」無限loop嘅唇槍舌劍後，七人車司機又突然間向天大叫「喂阿寶！落黎幫拖啊」，房車乘客似乎淆底但仍死撐：「睇你點x樣」，七人車司機就叫佢將架車泊埋一邊，唔好走，繼續嘈，似乎想援兵一到就發難，但房車乘客同司機隨即雙雙上車，之後竟然絕塵而去。

有網民就笑七人車司機「叫天兵天將幫手」、「嗌樓上伯母下嚟？」有人又笑稱「老母很忙，阿寶可以休息下先」。但有網民就爆料話當時係現場，雖然房車迅速走咗，但七人車真係轉彎停低，之後仲有兩名著拖鞋嘅中國籍男子疑似被召喚落嚟添！

【網民點睇】
●Fayez Chan：h1真係轉灣停低咗，架benz真係九秒九走咗，亦都真係有兩名著拖鞋嘅中國籍男子落咗嚟搵h1司機！
●Jeff Ng：H1師兄向上嗌，係嗌樓上伯母下黎？
●Lung Fong：電單車司機由最佳男主角變成最佳男配角。係你喇，阿發個外父～唔知有冇人有共鳴呢？
●Chris Tang：七人車司機扮係陀地吹雞，又真係嚇得下鬼喎
●Kenny Pkc：電單車已經知道無佢既戲份
●Lung Fong：其實Benz 佬同貨van佬係相愛既，點知殺出左個程咬金電單車佬...冇法啦～
●雷力：你唔好x走... 一支穿雲箭千軍萬馬來相見

《蘋果》沙士15周年系列網站，正式登場：
http://bit.ly/2FM4CHV