荷李活型男畢列谷巴（BradleyCooper）扮乜似乜，佢今年憑住話題電影《美國狙擊手》》（AmericanSniper）再獲奧斯卡金像提名，而畢列谷巴最近喺主演新片《摘星廚神》（Burnt）中就扮演名廚，故事講主角阿當經失去一切後決定洗心革面，憑住精湛廚藝重回巔峰，開咗一間史上最強嘅米芝蓮餐廳，奪得飲食界嘅最高三星殊榮。

《摘星廚神》攝製隊為了完美呈現高級餐廳格局，拍攝時特別去到倫敦朗廷酒店旗下餐廳取景，而趁呢套戲定在後日在港上映，本地電影公司同香港朗廷酒店旗下嘅美岸海鮮廳（TheBostonian）合作，推出兩款由英國米芝蓮名廚MarcusWareing為電影設計嘅主打菜式，於電影上映期間限量供應。

呢兩道由香港朗廷酒店行政總廚PedroSamper呈獻嘅佳餚分別係「Herdwick羊肉配紅菜頭及杏菌」（HerdwickLambBeetrootGirolle）、甜品「血橙芝士凍餅」（MascarponeBloodOrangeStreusel），前者價錢係528港元，後者就定為108港元，供應期由本周四起至到本月底，而每道菜式只於晚餐時段限量供應10份。