影壇盛事「第九屆亞洲電影大獎頒獎禮」今晚喺澳門威尼斯人隆重舉行，不少巨星名人亮相，而行紅地毯嘅藝人包括郭富城﹑裴斗娜﹑廖凡﹑黃秋生﹑王菀之﹑楊謹華﹑鳳小岳﹑都敬秀等，星光熠熠，現場有逾百傳媒﹑超過200粉絲，其中以EXO成員都敬秀最多粉絲支持。

楊謹華身穿低胸裙，與鳳小岳行紅地毯，兩人分別頒發最佳造型設計及最佳攝影獎。楊謹華及鳳小岳與阮經天（小天）份屬好友，講到小天近日與許瑋甯鬧情變，小天更被指搭上內地女星周冬雨。

對於「天甯戀」鬧情變，鳳小岳則謂：「你們問小天吧。（私下關心？）朋友當然互相關心，他需要自己空間。」小天喺微博直稱許瑋甯仍然係佢的女人，鳳小岳則說：「沒看過呀，不過不管他們做什麼，替他們開心，祝福他們找到彼此快樂。」楊謹華就話：「他們需要自己空間，不過關於兩人事情，要問他們。」佢又笑言：「今天來錯地方。」

另外，韓商小提琴天才SueSon風騷到場，佢以大露背打扮示人，又喪擺甫士畀傳媒影個夠，但就不慎露出膠紙；至於都敬秀就最受歡迎，佢亮相紅地毯時，粉絲即時大叫，甚至爬欄杆舉機喪影，表現瘋狂，而都敬秀亦向Fans揮手微笑打招呼，其間有Fans跌咗手機都懵然不知。

韓國組合INFINITE到場時，一班喪叫喪影相，佢哋表示係第2次黎澳門，司儀問佢哋最鐘意澳門啲咩？佢哋就好識做話最鐘意fans，仲話今日俾一個最靚仔一面俾大家，仲話「我愛你們」，梗係冧得粉絲一陣陣。