啱啱踏入2010年，娛圈咁快就有喜事發生，鍾鎮濤（阿B）再度榮升老竇，佢女友范姜噚日突然作動，嗱嗱聲被送入養和醫院，結果兩點幾就順利剖腹生咗位肥肥白白嘅千金，重8磅幾，名正言順係肥妹仔一名，真係可喜可賀。

手忙腳亂

其實范姜同阿B一早擇好聽日（14號）吉日剖腹產B，所有嘢都計劃好晒，當然阿B已經推晒聽日工作一心諗住陪女友剖腹。但係點知噚日范姜突然肚痛作動，身邊朋友家人立即送佢入醫院。
馮仁昭噚日一聽到呢個消息，馬上聯絡阿B嘅助手阿威，佢喺電話度承認范姜已經生咗：「醫生檢查下，B女趕住要提早同大家見面，於是決定立即開刀迎接BB女，阿B知道立即趕嚟醫院陪住范姜，BB女有成8磅幾重，母女平安。」阿B噚日原本要錄音，接住仲有工作要做，但係BB女提早出世，係有少少打亂佢原定安排，不過最後都搞掂晒，兼且為咗親自迎接BB女嘅來臨，乜嘢都值得啦！