將於下月24號入伍嘅29歲韓劇《爸爸很奇怪》男星李準，近日正舉行世界巡迴粉絲見面會，趁入伍前見粉絲最後一面。點知本月6號出發前往墨西哥準備開騷嘅佢，於當地時間上周四(7號)晚遇上黎克特制8級地震，隨後佢透過Instagram報平安，令粉絲安心不少(相關新聞： http://bit.ly/2wROjUK )，而見面會亦於當地時間上周五(8號)順利完結。李準噚日再次喺IG上載身處墨西哥機場嘅相，表示自己準備返韓國。

而李準近日接受訪問時亦有提到下月入伍，佢表示唔會因為依家係事業搏殺期就入伍而感到可惜，因為喺之前嘅作品亦獲得粉絲嘅愛，反而好期待入伍。另外，偶像組合出身變演員嘅李準，曾被拎嚟與同樣偶像變演員嘅男星任時完作比較，今次受訪時李準亦大方回應呢個問題，指外界拎佢同任時完比較會覺得好開心，又大讚對方演技都好好。