賭王何鴻燊縱橫澳門賭業逾半個世紀，他的事業及多情的生活更引人入勝，更成為電影《賭城大亨之新哥傳奇》的故事藍圖，由劉德華飾演賭王原形「賀新」。超盈笑言有看過此片：「我第一次睇呢部戲係同爹哋睇，當時我9、10歲，喺爹哋房睇，媽咪問我電視呢個似邊個？一睇個髮型gel晒後面似爹哋，我有問爹哋劇情係咪真？係咪真係有槍指住佢個頭，佢喺度笑唔答我。其實爹哋都覺得搵劉德華好啱，要搵一個靚仔做先似。」但超盈反而覺得「賭神」周潤發更有神髓：「覺得佢型、高大，佢有一刻行入賭場，好似我細個爹哋去家長日，又係有兩個保鑣伴住，啲人望住。」

超盈指賭王亦有留意其他賭片：「佢好鍾意睇周星馳笑片，鍾意睇佢叫吳孟達做『三叔』，喺《賭俠2之上海灘賭聖》入面大戰法國賭神「今晚打老虎」嗰場，爹哋識法文知呢句點解，之後就成日用嚟做笑話。」但原來大家心目中的賭王，現實生活中不太熱衷賭博遊戲：「𠵱家佢同我哋打麻雀，佢本身唔係好賭錢，以前去旅行都有同我哋玩吓鋤大D，佢有教賭錢做莊一定贏，我自己就唔識玩百家樂、Black Jack。」