世界盃賽事掀起廣大球迷的關注,連一班平時舉止斯文的模特兒,都對世盃賽事十分着迷。前晚一眾有份為連卡佛fashionshow演出的模特兒,都與在場記者大談波經。
豪宅似俱樂部
其中歐陽妙芝有一個叫人十分羨慕的經歷,她說:「我本來唔係十分迷足球嘅,但係喺年半前,我同班朋友去意大利旅行,有一日我嘅意大利朋友話帶我去佢一個朋友屋企玩,去到嗰間屋時,第一個感覺係,嘩!乜間屋咁靚嘅,又大又有𨋢,十足好似間俱樂部咁,而屋裏面重擺滿好多張靚仔相,睇真啲有啲熟口面,原來就係意大利隊隊長馬甸尼,而招呼我嗰個就係馬甸尼嘅太太嘞!」
故意不聽賽果
歐陽妙芝愈談愈興奮,她續說:「佢哋個仔重好活潑,通屋跑,阿馬甸尼太太重同我哋講,佢老公就快返,叫我哋等埋佢先走,不過我哋梗係唔好意思啦,不過我哋成班人都當咗馬甸尼間屋係名勝咁,四處影相留念。」
而名模陳嘉容亦對今屆世界盃十分留意,她說:「好多時晏晝做嘢,已經有咗部份賽果,我都專登唔聽,留番夜晚返屋企睇錄影帶。」至於最喜歡哪一位球星?陳嘉容說:「我同大部份球迷一樣,都係最迷碧咸同中田英壽。」