經典電視劇《大時代》入面提到嘅「大奇蹟日」，一向只用嚟形容港股，𠵱家可能用埋喺立法會選舉都得。噚日唔少人花時間排長龍都要投票，財經界人士今年亦特別關心選舉，靚佬股評人鄧聲興（Kenny）與「新股女王」鍾絳虹（Pamela）甚至係首次投票㖭呀。
君陽證券行政總裁鄧聲興話佢登記咗做選民好耐，但過往一係太忙，一係身在海外，所以冇投過票。今屆地區直選，佢覺得必須要行出嚟投票，佢係新界西選民，又代表公司投票選金融服務界，問佢投邊位，佢就笑騎騎唔肯講。

業界 𥄫實上市改革

中央證券登記董事總經理鍾絳虹（Pamela）坦白承認，佢以往屬於政治冷感嘅人，但今次即使揀唔落手都試吓揀。佢星期六上網研究咗成日，噚日朝早8點就去投票，可能係最認真嘅「首投族」！Pamela係港島區選民，同Kenny一樣，唔透露自己選邊位。
有投票嘅資深股評人陳永陸（陸叔）都話，今年財經界比以往關心立法會選舉，地區直選固然競爭激烈，多場選舉論壇，讓市民睇得過癮；此外，金融服務界有3位候選人競爭，撞正證監會推上市架構改革諮詢，畀候選人有個大議題去發揮，業界自然特別留意，佢估計投票結果對上市改革都有啟示作用。

李華華
mailto:[email protected]