雨傘革命後成立、至今有近150名成員嘅青年新政噚日開記者會介紹目標同理念，開宗明義主打本土議題、港人優先，積極考慮派最少8人出戰年底區議會選舉，槍頭瞄準建制派巨頭，九西黃埔區派出靚女OL社區主任游蕙禎對撼西九新動力鼠王芬，中西區觀龍就由召集人梁頌恆越級挑戰民建聯葉國謙，其他成員考慮出選油尖旺、九龍城同葵青區。

佢哋講明唔同泛民政黨協調，「絕不會視賣港賊為同路人」，只會同佔領運動後嘅新興團體合作避免撞區，但亦唔會專登狙擊泛民，目標係喺保皇黨同反對派之外建立本土第三勢力，重奪議會。
梁頌恆承認如要參選，𠵱家起步其實算遲，但呢班自稱無背景嘅政治素人未驚過，仲話落區時有居民問清楚唔係保皇黨，歡天喜地咁接傳單，認為唔少港人都希望求變。
佢哋現階段會多啲落區接觸街坊做調查，交通、環境等都會關注，貫徹由下而上嘅政治理念，「只要香港人願意同我哋行落去，我哋一定會同香港人行到最後」。

李八方
mailto:[email protected]