周永恒（Roy）舊年因為同劉依靜（Ruby）搞婚外情兼涉打老婆趙頌茹（阿Yu）而搞散咗頭家，自認係「人渣」嘅阿Roy仲同細佬返咗深圳開咗間瑜伽中心，前排又無啦啦喺fb留言話自己知錯，喊晒口求阿Yu原諒，但同時仍有唔少報道話佢同小三Ruby藕斷絲連。

不過，阿Roy感情錯綜複雜，原來佢已經另結新歡，噚日傍晚阿Roy喺fb上載三張新相，睇見阿Roy攬住疑似長髮新歡合照，表現甜蜜留言：「feeling blissful（充滿喜悅）。」感情盡在不言中。馮仁昭打畀阿Yu問佢點睇呢件事，佢話：「哈哈，咁咪好囉！咁佢有佢嘅生活，我有我嘅忙碌。唔好再打擾我哋三母女。」有讀者報料話呢位疑似新歡係𡃁模周芷儀（Aibble），馮仁昭打畀佢了解吓，點知未問完佢已經收咗線，阿Roy亦都冇回覆。
此外，阿Yu噚日喺銅鑼灣出席美容活動，大會安排佢喺半裸大隻男胸口貼上印水貼紙，阿Yu睇嚟有啲尷尬，講到司馬燕嘅老公疑似有婚外情，阿Yu話：「好似感冒咁，食多啲維他命C就有抵抗力。希望各位女性自強同自愛，人生可以探索愛情以外嘅嘢。」
撰文：馮仁昭