工欲善其事，必先利其器！K.Oten嘅「全攻型收音機」近排鬧哄哄，僭建9吋長天線，喺文憑試（DSE）考場內大戰平民收音機，八方就特登去考場巡個圈，發現唔少考生其實較鍾情於傳統嘅Sony、AIWA收音機應考，都一樣收得唔錯，只不過係機面少咗張Oten貼紙，少咗份霸氣。

而噚日考數學嘅同學仔用嘅計數機，除咗識計數，仲可以儲存方程式，又可以Replay，堪稱係全攻型智能計數機！八方年紀大，以前會考高考啲機冇咁叻啦。仲有呀，𠵱家考試冇得拆散部iPhone，拎個電池出嚟以證清白，所以咪成日有人心癢癢，偷拍自己啲准考證、考生條碼囉，智能手機誕生前，想喺考場影相邊有咁易吖。