近期賽事頻頻發生墮馬意外，繼早前「嘉福」後，上周末日馬（11日）又有「閃耀飛輪」競賽途中出事，唔少馬迷都對短時間內接連發生墮馬意外議論紛紛，更加有意見認為賽期太頻密，係跑死馬嘅原因。據知馬會亦好重視連串墮馬事件，準備再加緊賽前馬匹健康檢查，預防意外發生。

跑馬最唔想見到就係意外導致人馬傷亡，但講明係意外，有時事前亦好難百分百預防，例如馬匹賽事途中突然心臟病發，就算賽前檢查都未必有徵兆。巧合嘅係，今季幾宗墮馬意外都牽涉本地騎師，慶幸幾位華將都算有驚冇險，但係涉事嘅馬就冇咁好彩，馬匹有冇潛在健康問題，後果可以好嚴重，真係唔可以掉以輕心。

接連嘅墮馬意外，或者已經畀咗警號，據知馬會內部亦高度重視呢個情況，近期嘅兩宗意外，馬會事後亦有詳細跟進，分別對「嘉福」同「閃耀飛輪」進行解剖，希望搵出兩隻馬嘅死因。其實事後搞清楚馬匹有乜健康問題，對日後嘅檢驗同預防工作都有幫助，做多啲絕對冇壞。

目前每隻出賽馬賽前都要經過獸醫例行檢查，仍然咁多意外，不期然令人覺得現行做法仲有改善空間。聽聞馬會已經諗緊，點樣喺賽前檢查方面可以做多啲功夫，及早搵出有健康問題嘅馬。喺人馬安全前提下，馬會絕對唔希望見到慘劇發生，相信會認真對待呢個問題。

除咗馬會之外，牽涉馬匹健康狀況，絕對需要練馬單位配合。練馬師絕對清楚訓練馬匹嘅健康狀況，喺操練同催谷馬匹方面，練馬師都要諗吓點做係對隻馬最好。要減低傷病馬陣上意外機率，確係需要馬會同練馬師雙方面好好配合。

阿Joe