世界盃近日正進行得如火如荼，雖然只係分組賽階段，但各國球隊踢埋今晚，就已經全部踢完第一輪……

睇波唔係男士專利，當然足球亦未必啱女士口味，但其實球場上係滿佈住靚仔美男，即使你唔識睇，但睇下佢哋熱血、充滿併勁、又大隻嘅外型，就已經夠賞心悅目。以下為《蘋果》為你嚴選嘅世界盃10大美男，當中仲好多都來自強隊，餘下賽事記得mark實留意。

【C朗】Cristiano Ronaldo（葡萄牙）
司職：前鋒
年齡：33歲
身高：185厘米
講起靚仔，點可以唔提C朗？來自葡萄牙嘅佢可謂當今最紅球星，靚仔、大隻、勤力就係佢嘅代名詞，雖然份人夠晒寸，但確係寸得起，於上場對西班牙更上演帽子戲法，一個人carry晒成隊，靚仔兼好波，無得輸。

【基奧特】Olivier Giroud（法國）
司職：前鋒
年齡：31歲
身高：192厘米
號稱「銀河唯一」嘅基奧特，絕對係天際最強人物。基奧特曾經係阿仙奴領隊雲加嘅後備王，強勁嘅頭鎚就絕殺唔少龍門，後來更慘被賣去車路士。今次佢再次代表法國，可惜上次正選上陣未能入波。

【列奧斯】Marco Reus (德國)
司職：前鋒
年齡：29歲
身高：180厘米
被譽為全隊都條模特兒級水平嘅德國隊，要嚴選當中最靚仔嘅確實好難，但列奧斯依然勝出，贏就贏在夠型，個頭永遠gel到行。佢現效力德甲球隊多蒙特，仲係2017 FIFA足球遊戲封面人物。上場對墨西哥後備上陣，但最終都未能力挽狂欄慘輸1球。

【奧祖亞】Guillermo Ochoa（墨西哥）
司職：龍門
年齡：32歲
身高：185厘米
講靚仔，點可以唔提「墨西哥Sam哥」奧祖亞？同本港影星吳鎮宇撞樣嘅佢，仲係一位出色嘅龍門，對住上屆冠軍德國都保持clean sheet零失球，最重要嘅係佢真係好似吳鎮宇呀！

【尼馬】Neymar Jr. （巴西）
司職：前鋒
年齡：26歲
身高：175厘米
講巴西，點可以唔講尼馬？貴為超級球星，尼馬似足C朗咁寸，今次仲整咗個黃金公仔麵頭，帶住陣陣嘅MK味，但佢確係寸得起，基本上個波一上腳就無人搶到，入球能力極高。現時佢效力巴黎聖日耳門，但似乎唔多開心又想轉會，不過佢都係專心踢好世界盃先啦，上場一掂就跌，波都未入到一粒呀。

武藤嘉紀（日本）
司職：前鋒
年齡：25歲
身高：178厘米
靚仔唔一定喺晒歐美，來自日本嘅武藤嘉紀一樣外型吸引。武藤嘉紀現效力德甲球隊緬恩斯，眼大大個樣非常可愛，今晚佢就將會上陣對住哥倫比亞，大家記得留意住。

【基沙文】Antoine Griezmann (法國)
司職：前鋒
年齡：27歲
身高：174厘米
法國出名多靚仔，而基沙文就可謂靚仔中嘅靚仔。現效力馬德里體育會嘅佢係一名前峰，上場更憑罰球（兼對方烏龍送禮）而贏澳洲。

【舒亞】Fabian Schaer (瑞士)
司職：後衛
年齡：26歲
身高：186厘米
現效力西甲拉科魯尼亞嘅瑞士後衛舒亞，大隻又充滿陽光氣息，曾代表瑞士U23國家足球隊參加2012年嘅倫敦奧運會，早已光茫四射。上場面對強敵巴西嘅超強攻力都可以守和，證明實力唔簡單。

【施格臣】Gylfi Sigurdsson（冰島）
司職：中場
年齡：28歲
身高：185厘米
全世界最熱血嘅球隊，一定係冰島。成個國家少人過沙田，但就有十分一人口飛到現場撐球隊，上場仲可以守和超強對手阿根庭，點可以話唔勁？而當中正效力英超球隊愛華頓嘅施格臣就係功臣之一，當然外型都唔差啦。

【占士】James Rodríguez（哥倫比亞）
司職：中場
年齡：26歲
身高：180厘米
於上屆世界盃光茫四射嘅占士，現時正由皇家馬德里外借到德甲球隊拜仁慕尼黑。今晚佢將會上陣對日本，再次展露可愛嘅笑容，靈巧嘅腳法。

一網睇盡
足動世盃 直擊俄國最前線
https://hk.feature.appledaily.com/worldcup2018/