香港失業率高企，多勞不得；事關有人做埋別人那一份，有秘撈，一身兼幾職。
貴為特首夫人的，密密實實，經醫管局高級護理行政經理踢爆，原來秘撈做護士！秘撈有晒title，叫做「nurse趙」。飛起夫家的董字，擺明係想掩飾身份。董太讀護士出身，沙士肆虐，她毅然出山幫拖，向護士提供零食、纖體食品和燕窩。而較早前「nurse趙」𦧲飯應到牛頭角下邨，扮晒懵太超人娛樂獨居的長者，那身衣服，絕不屋邨師奶feel，甚有模特兒風采。看來，她另一份兼職是做特約茄喱啡。紅十字會拉隊去牛頭角下邨攞景，有可能是幫周星馳度緊橋開戲。

至於在沙士風暴中變身「隱形隱者」的保安局長，一次咁大把在公開場合露底，自爆兼職做商場清潔工人的秘撈。那天，局長戴晒手套口罩，出力抹扶手電梯，那塊抹布卻像反23條的市民那樣不聽使喚。用慢鏡重播鏡頭，會發現其實局長是故意失手，以掩飾她的勞動人民垂範的身份。疫潮下不少市民向醫護人員致謝，清潔工人同樣以身犯險。地盤頂樓的林振強可以代表我，向局長送上飛吻致敬！但同樣是兼職掃街的阿蟲，垃圾愈掃愈多，可能要搵自己架Lexus載走，似乎不夠專業。建議他，秘撈賣車好過掃街。買賣的是隱形戰車的話，包冇人知，就唔使搞到要用漂白水洗底！