歐聯抽籤，球迷抽水！辛苦碌入8強嘅曼聯，將會面對大熱門拜仁慕尼黑，我求大俠都忍唔住要引用桂神金句：佢哋晉級機會得兩個，就係冇機會同渺茫！香港高登仔鍾意改圖抽水，其實中外都有「高登仔」，佢哋一齊發揮創意，務求抽到領隊莫耶斯乾塘為止。

歐聯對拜仁九死一生

最好笑應該係嗰張「英超領隊保衞莫耶斯」。呢張改圖嘅概念唔算新，因為由季初起，已經有球迷話，莫帥得到其餘19支英超球迷同領隊支持；事關一日有莫耶斯，曼聯都發揮唔到應有實力，難怪圖中摩連奴、雲格、比歷連尼同羅渣士都要保護佢，唔畀拜仁搞到佢落台啦。
另外，球迷幫莫耶斯諗咗個鐵桶陣出嚟對付拜仁；搵費蘭尼打中鋒頂波同去角球旗拖時間，笑佢淨係識九九八十一斬！亦有球迷搵張拜仁慶祝啤酒節嘅相出嚟，話拜仁知道抽籤結果後仲唔飲勝咩。
講番啲正經嘢，曼聯呢場歐聯真係九死一生㗎，本身牌面低，領隊實力又唔夠，最慘係主力射手尹佩斯要養傷4至6個星期，肯定對唔到拜仁，仲有啲媒體話佢可能會收「咧」㖭，都咪話唔大鑊！
知道抽籤結果後，莫耶斯講埋啲老套嘢，話個個對手都咁難打，抽到邊隊都冇所謂；門將迪基亞就老實啲咁話：「呢次抽籤真係黑仔，係人都知拜仁係今屆歐聯最強嘅球隊。」
另外，莫耶斯今季好鍾意去德國考察拜仁中場卻奧斯，呢次有機會喺奧脫福近距離睇辦，相信佢可以慳番程機票，不過會唔會最終俾卻奧斯一腳踢出局呢？