黃子華於棟篤笑上講完奶奶同新抱嘅關係，跟手再講佢之前劇集《My盛Lady》一推出就遇上網民呼籲罷睇，依家開騷，又遇著佔中。子華笑言:「其實我都預咗今晚嚟唔到0架喇。咁當然梁振英即刻走出嚟……嗱各位我唔想講太多，我講埋呢幾句我唔講0架喇，我冇預備講呢樣嘢0架嘛!我年半前就準備好晒講乜嘢0架喇，忽然搞啲咁嘅嘢……但唔講我又有啲唔爽，所以俾我講埋呢幾句，ok？」全場尖叫。

「掟咗78枚(應是87枚)催淚彈之後，梁振英就出嚟講喇:『應該呀，警方係用咗適當嘅武力啦！』，葉劉淑儀又出嚟講係適當嘅武力:『啲人有武器0架，有把遮0架喎!』我唔知點解啲高官係咁樣嘅，你唔係與民為善嘅咩？我知道你應保護警隊，但你唔使下下分化得咁緊要。你可以話警隊係專業，我亦相信警隊係專業。但問題係，警隊掟催淚彈唔係專業0架嘛？佢哋掟咗幾多次催淚彈？香港太平盛世幾十年，十年都掟唔到一次，你十年冇煮過一次餸你敢認大廚？」

子華再謂:「如果我係政府，好簡單，當你警隊係專業嘅，但係掟催淚彈，佢哋係比較業餘嘅。冇問題0架，等如抗議班人都係業餘，嗰班人唔係專業抗議者嚟0架嘛。所以業餘對業餘，咁咪一齊誤會囉，和氣生財嘛!做到咁高位都唔識講？『係一場誤會!一場誤會!』咁咪搞掂。」