啱啱呢個星期,雖然內地降咗準,但人民幣貶值預期亦浮面,內地貿易數據亦唔好,對於中資股嚟講,過去一個星期不利因素似乎多過有利因素。內地通常每年上半年資金流會略為偏緊,令中資股進入淡季,晉佳覺得今年上半年並唔例外。睇番客觀環境喺環球放水下,錢多得滯,相信短期內主要經濟體好難觸發信貸緊縮進而變成危機,即使港股短期氣氛麻麻哋,但又唔似有條件大跌,睇嚟呢個中資股淡季內,資金只會換馬去資產股,而非離場。
恒指仍能撐住24521點呢個位,距離25000點關口只係一步之遙,年初到而家更加升咗一千點左右,反映大價股表現實在唔差,只要等到新利好因素,恒指就能夠強勢突破25000點,中線值得保持樂觀。
除咗資產股外,近期表現最強嘅大價股有恒生銀行(011),之前傳緊佢會出售手頭上10.9%興業銀行股權,以達到核心資本充足比率,又能夠保持高派息,被視為一大利好因素。雖然呢個因素能夠刺激股價向上,但係令到恒生咁強勢破頂就有點兒誇張。其實恒生沽售興業銀行股權仲有另一種可能性就係為引中資入股鋪路,如果想法準確,恒生股價就貴一貴都值。
目前部份上市家族銀行已賣盤予中資銀行,證明本地銀行對於中資行嚟講係吸引。至於滙控(005)加埋恒生,香港市佔率相當高,而後者保持股本回報率20%以上,經營能力之高強,真係喺香港絕無僅有,只要滙控肯減持,中資行絕對唔介意貴少少去入股一間咁高質素嘅本地銀行,所以趁恒生值錢,炒高佢,然後引資,並非冇可能,股價越強勢,呢個諗頭越可信。
至於有賣盤聯想嘅本地家族銀行,就係大新銀行(2356)。雖然吹水係吹咗好耐,但未聞樓梯響,事實上,大新銀行主席王守業已經對賣盤持開放態度,但聽聞唔賣盤原因係大新接班人對於家族銀行生意,仍然雄心壯志,點都想搞一番作為。
不過,其他中小型銀行賣盤過後,背後可有大水喉提供低廉資金喺市場上面競爭,大新銀行同佢哋展開惡鬥,於劣勢之中生存,難度實在高,賣盤睇嚟係遲早嘅事,去到二○一五年,似乎都夠遲啦啩。大新銀行目前市賬率一倍都唔夠,未計賣盤溢價,單計估值都夠平,值得持有,如果真係博到賣盤,五成升幅實在唔少得。
晉佳
http://www.facebook.com/pages/晉佳/719009541518415
本欄逢周二刊出