當年今日

地產多聲導:地產商唔等得

蘋果日報 2002/02/27 00:00


馬年矚目新盤愉景灣海澄湖畔內購銷情理想,公開登記首日反應就麻麻地,不過,其他發展商都唔等得咁多,一於照推盤,嘉里建設(683)嘅大埔滌濤山將於明日開記者會公布詳情。而永泰亞洲賣咗一段時間嘅小欖漣山,都響聽日公布「新買家獎勵計劃」,睇嚟又係「着數」嘅優惠。

劉皇發歎香港烏燈黑火
蘭西噚日響九鐵屯門兆康站平頂儀式後,與屯門區議會主席及有「新界大地主」之稱的劉皇發吹吹水,傾到有關佢新田發展項目時,便好嘮嘈咁話啲地應攞來發展,且密度愈高愈好,要好似對河深圳咁起晒高樓大廈。佢重打趣話內地人以前游水落嚟,都知道游向燈火通明處就一定是香港,但𠵱家就弊嘞,游上岸先知去錯地方,因為𠵱家「光澄澄」的喺深圳,香港嗰邊烏燈黑火。
政府近年為了搜集民意,都好興做吓調查,但蘭西聽啲業內人士講,受委託做調查嘅公司,好多時都係響調查前做吓諮詢,中段又搞諮詢,到收尾出來嘅結果同市場意見差唔多。
蘭西