冠軍騎師潘頓這天一直做茄喱啡陪跑冇贏過馬。所謂知恥近乎勇，他於第九場三班泥地短途1200米，殺番雷神一次，報番頭場騎「有意思」不敵後者「團圓飛舞」做阿二之仇。
今場潘頓以容廐「盈利駿馬」後上擒下雷神3.9倍大熱門「海紅寶」，取得個人今日第一捷，5.7倍建功，繼頭場後兩大高手又串Q，大熱連贏位都有11倍唔錯；雷神跑完第九場騎師王已經有56分，宣告提早封王，買佢未完場已經可以收錢。
「盈利駿馬」雖沿途第四位，但直路中段仍落後不少，此駒於外欄及時後上衝贏「海紅寶」開齋，不知潘頓是否之前鬱住道氣，過終點之際潘頓向內側之雷神「睥」咗兩眼，是否同第五場佢騎「英才」直路畀雷神「再出奇」食位追唔切失Q有關？
今場跑第三係「劍飛聲」，第四名「心花怒放」，四重彩12,409元。三隻落飛馬「頌友」、「一哥」同「太陽驕子」齊叮。