陳美齡（Anges）今日喺銅鑼灣，為佢即將喺12月27、28日於伊館舉行嘅「無限量的愛 陳美齡一曲二話講唱會」出席記招，事隔30年再喺香港做大型演出，Agnes表示心情既緊張又感恩：「今次除歌曲外，仲會分享教育及育兒心得。」

大會司儀問到Agnes係咪會向家長分享小朋友入讀史丹福大學嘅貼士？佢笑言：「我真係知道史丹福或者其他頂尖大學對收生有咩要求，或者尋找緊一啲點樣嘅小朋友，所以睇完今次講唱會或者會得到一啲貼士。」難怪今次叫做講唱會。

Agnes又補充，教小朋友，最緊要令佢哋有自我肯定能力，而且教育唔應該太嚴肅：「如果要嚴肅嘅，應該留返畀教育局。」

講番今次演出，Agnes話唱歌同講嘢比例會佔一半一半：「依家仲開會傾緊，因為好多人想我唱多啲歌。」對於今次能再度喺香港演出，Agnes希望可以分享多啲正能量畀觀眾，同時因為要應付日夜共三場演出，故要開始做運動練體能：「要每日喺屋企跳空氣繩，原來一啲都唔容易，跳兩分鐘已經好辛苦，希望可以一路練落去。」

至於三個仔到時會唔會陪媽咪上台？Agnes話：「有兩個仔會返嚟，到時亦會有一Part大家上台分享，可能有機會佢哋會講吓少少感受啦。」