香港有渣打馬拉松，嵩山少林寺最近都搞咗個五岳超級馬拉松，請咗唯一一個女藝人超人之母羅子喬(Bella)，呢個五岳馬拉松係內地第一個可以跑入景區、山區嘅越野超級馬拉松賽事，整個賽事仲引入咗國際超級馬拉松賽程100K，50K、25K、10K，仲有5K，超人之母呢！就係跑5K。

羅子喬第一次去少林寺跑山，佢心情都幾興奮，不過見到啲相，啲山又幾高，啲路又幾斜，唔知係咪好難跑呢？見到Bella拉筋拉得好狠下，佢話：「馬拉松真係第一次跑，所以今次可以被邀請係有啲緊張，之前其實一直都有行山，同埋有跑山嘅經驗，所以無咩高山反應，都夠氣架！不過之前感冒咗半個月，自己擔心參加唔到，好彩好得七七八八，所以無咩問題，條賽道都係得少量斜坡，唔係太危險。嗰日係有啲凍，同行有私人教練，如果有時間我都想留學功夫，有師傅見到我拉筋都話我有潛質架！」

挾超人之母之名上少林寺跑馬拉松，羅子喬笑笑口話：「同行有香港朋友，同內地一個媒體，見到我有人叫我超人媽咪，原來真係有人知道，咁以後我會努力，好好保護地球喇！」Bella話今次去少林寺係一個唔錯嘅體驗：「一直好期待去少林寺，天下武功出少林，而且自己一直都有學功夫，所以都好想觀摩下，今次無同少林弟子一齊跑，佢哋好好為號今次馬拉松做義工，負責成段路嘅指揮，所有路線都係佢哋做領航員，同埋原來唔係所有弟子都係光頭o架喎！」

喺東南亞做完超人巡迴之後，羅子喬會再進軍內地，仲會開拍新戲，喺開戲之前跟黃秋生學戲，佢話：「最近為咗之後電影做準備，所以都係以訓練為主功夫、跳舞、日文為主，依家係喺台灣、日本時間比較多啲。」