自從袁仁祥背叛「月餅場」,將一手創立嘅水貨店搬去銅鑼灣後,生意總算有番起色。聽佢講,佢夠膽搵個銅鑼灣地舖做水貨生意,全因睇好「自由行」巿場。袁仁祥話:「唔好以為國內同胞唔識嘢!佢哋有時重快過我哋,尤其係上海同北京嗰班,佢哋嘅StreetCulture已十分成熟。所以我𠵱家賣原宿水貨,都唔志在做香港班細路生意,相反要睇實國內班潮人。」第一次聽袁仁祥講StreetCulture,不禁有點汗顏。不過佢話自「國內行」實施後,確係多咗啲「潮裝」表叔嚟幫襯,佢哋多數選購袁仁祥自家名牌「2001齊天大聖漫遊」,以馬騮仔戴住個太空人頭盔嗰款Print最受歡迎,相信係攞返國內做手信,唔知國內班細路見到會有乜反應?袁仁祥話為新舖已用盡佢畢生積蓄,好彩證明冇投資錯誤。「𠵱家使一毫子都要計過,所以上個禮拜你話銅鑼灣雜誌減價戰單嘢,我都好有同感。𠵱家我都係轉去糖街地庫買書,Sogo後面間嘢實在食水好深,聽講佢哋都諗緊減價還擊。到時就益晒我喇。」
文:大食Jack