台灣文青天后陳綺貞早前推出咗《瞬》同《吉他手的小動作》兩本書，今日佢去咗銅鑼灣誠品為呢兩本作品舉行簽書會，大批歌迷一早到場排隊。喺今時今日依然有唔少人冇玩facebook、微博呢啲社交網，綺貞就係其中一個，佢話因為呢個原因所以先出書同歌迷分享吓自己嘅想法。

綺貞話原來自己第一次主持嘅簽書會就嚟咗香港搞，仲話自己好愛香港：「昨天一早就來到香港，周圍走走。」咁食咗啲咩？綺貞話噚晚去咗北角街市熟食市場食大排檔，仲話要邊簽名邊飲凍鴛鴦，識真識揀。

問到綺貞幾時會再嚟香港開演唱會？佢話：「希望明年可以，現在接洽中。」仲話未知係咪開紅館，如果係就最好啦！