米蘭站（1150）主席姚君達正忙緊為公司上市做推介，究竟米蘭站啲股票升值潛力高啲，定係佢哋賣嘅名牌袋好炒啲？暫時唔知。不過，姚君達點樣由300蚊起家，到家控制逾25億資產，華華就知！
當年中三畢業嘅姚君達，有日喺《勁歌金曲》睇到譚詠麟戴住副型爆白框太陽眼鏡又唱又跳，所以用咗300蚊本錢，入咗批同款A貨，喺尖沙嘴加連威老道中電客戶服務中心門前擺地攤。由於小販管理隊每晚泊定架車喺中電客戶中心對面，搭正11點就捉小販，所以佢只喺晚上8點至11點開檔。咪睇得3個鐘做生意，佢一晚就清貨，淨賺3000銀。除咗要多謝譚詠麟嘅號召力，姚君達嘅生意頭腦同眼光都唔差。

03沙士平價收靚袋

後嚟佢認識咗一位喺名店做嘅售貨員拍檔，繼而同章小蕙、余安安合作賣明星二手衫，再到開米蘭站賣二手名牌，踏上發達之路，佢話最「發達」嗰次，要數03年沙士。當年可以話係「百業蕭條」，個個女人走去「舉」袋套現，平日極難搵到嘅限量版靚貨，嗰個時候可以平價收返嚟。其後市況好轉，呢啲靚貨全部幾倍價錢賣出；加上中央開放自由行，佢更加受惠。

李華華
mailto:[email protected]