華華睇武俠小說，書中描寫少林武術十分奧妙同高深，特別係易筋經，學識之後就可以打遍天下無敵手咁滯，成日都想見識吓，原來𠵱家喺信和集團旗下嘅屋苑都可以有得學，仲係唔同年紀都可以學㖭，搞到華華即刻有搬去信和屋苑嘅衝動。
信和集團聯席董事楊光話，將有逾1500年歷史嘅嵩山少林武術引入旗下屋苑會所，等住戶都可以學吓，強身健體。下個月就會喺北角半山寶馬山花園、九龍塘帝景峰、大角嘴一號銀海、大埔太湖花園、粉嶺嘅碧湖花園、御庭軒同帝庭軒、馬鞍山嘅海典灣同雅濤居等近20個會所開班，之後仲會分階段推廣至他屋苑會所。

屋苑活動都爭餐飽

課程為期2個月，其中「青少年少林基本功」會教授少林基本功，而「少林養生功」課程就教禪理、洗髓功同易筋功等。
咁乜嘢人教呢？就係由大嶼山大澳嘅香港少林武術文化中心派出師傅教授。上完堂仲會有證書攞㖭。華華聽曾去過大澳上堂嘅朋友講，嗰度啲師傅個個都身懷絕技，好好武功，唔係得個樣㗎。
以前發展商啲住宅樓盤，提供畀住戶嘅活動，來來去去咪係畀小朋友學嘅畫畫同音樂興趣班，畀大人學嘅就係廚藝同瑜伽班，估唔到𠵱家越嚟越多元化，唔知遲吓仲會有啲乜嘢意想不到嘅新嘢提供呢？睇嚟發展商連搞屋苑活動都要爭餐飽。
[email protected]