英國《每日郵報》禮拜二影到前英格蘭前鋒朗尼揸車返去愛華頓嘅練習基地，準備就上星期醉酒駕駛畀警察拉咗單案，同領隊朗奴高文解話，兼畀佢「照肺」，報道話朗尼呢鋪隨時會被罰兩個禮拜人工、即係230,000鎊，大約係港紙230萬。不過破咗財，係咪擋到災，唔使同老婆離婚呢，依家就仲係未知數！

朗尼係喺英國時間禮拜二大約下晝兩點俾人影到揸車返到練習場，佢今季英超表現雖然唔錯，依家已經射入兩球，不過醉駕呢單嘢就肯定激到朗奴高文紮紮跳，其中一個原因就梗係高文原本希望朗尼回歸，係可以做到一班年輕隊友嘅榜樣，點知依家又搞單咁嘅嘢出嚟，高文真係唔嬲就假喇。愛華頓嚟緊喺英超主場鬥熱刺，朗尼最好真係生生性性，踢番場好波做好自己喇！