6020A係兩音路喇叭,高頻係四分之三吋金屬震膜,低頻就用四吋圓錐震膜,而高低頻輸出各由一組獨立20W功率擴音機嚟推;Alan話:「雖然係平民版,一樣保持番鑑聽級嘅風格同質素,就係啲聲音好準,原汁原味忠實重現原音,唔同其他喇叭咁加咗味精。」
Alan又講,6020A細細座擺位固然方便,外形設計又討好,設計簡約利落,有黑、白兩種顏色,擺喺客廳都好靚仔。
問起價錢,Alan話Genelec以往賣畀錄音室嘅鑑聽級喇叭,一隻講緊幾十萬,而呢款平民版嘅6020A,一隻賣4,500蚊,就可以踏入鑑聽級嘅門檻,算係超值喎。咁大家睇完係咪都唔覺得貴?