酒後吐真言就聽得多，原來賭後吐真言都行得通？巴塞隆拿前鋒尼馬呢邊廂被指同女友布魯娜再度甩拖，另邊廂據巴西《環球體育》報道，尼馬日前出席同朋友嘅牌局聚會，席間佢位未來「妹夫」兼前山度士隊友盧卡斯利馬就自爆已經同巴塞達成協議，將會喺明年1月1日免費加盟！

巴西傳媒喺本周初爆出呢單轉會消息，雖然26歲嘅進攻中場盧卡斯利馬貴為森巴國腳，但始終名不見經傳，令外界質疑係流料。不過，尼馬被指對呢位同妹妹拉斐爾娜熱戀中嘅前隊友寵愛有加，推薦巴塞簽人，加上盧卡斯利馬同山度士嘅合約到年尾結束，意味巴塞明年就可以免費添兵，都算係筍deal。話雖如此，據報山度士對盧卡斯利馬喺合約未完結前私下接觸巴塞好不滿，甚至有可能就佢提早公開消息提告。