當年今日
關於我們

【金手指】波叔是蘇斯克查?(下集.孫柏文)

蘋果日報 2019/02/18 21:00

金手指孫柏文

上期我話財政司司長陳茂波,係呢幾個月將費格遜式足球,重新帶回曼聯嘅蘇斯克查。因孫柏文成日覺得殖民年代嘅香港,就係費格遜年代嘅曼聯。而波叔,真係有嗰種當年嘅風格。
點解?早排「派四千」,唔少人謾罵波叔。話:「用咁多行政費,不如全民派啦!」不過波叔都唔動搖。
香港人,唔怕你政府廢,最怕你嘥錢。呢個雖然唔得民心,不過就係喺冇民意授權下,唯一能穩住政治控制權嘅方法。英國佬嘅神髓。
啲好打得嘅人,唔明罵叉你,其實係曲線肯定你。例如當年政府起嘅大廈,用「包浩斯」風格。即係要實而不華。樓梯條扶手都用磚砌出來,就係其一特色。
當年,唔知幾多知識份子,日日話政府起嘢「好核突」、「冇美感」、「不思進取」等。特區啲手好打得,不過冇腦嘅官員,就會認真檢討建築風格,希望「做得更好」。
殖民時代呢?啲鬼佬官唔知幾開心俾人鬧核突,因為每次有人鬧,聽嘅人就會更信「嘩!呢個政府cheap到呢!」即係政府會去到幾盡去唔嘥錢。波叔唔知係特登,定係扶轆撞棍,希望佢可以維持表現,做我哋嘅蘇斯克查。
尋日同梁心欣傾計。我問有乜好買,佢話不問價追隻映客(3700)。甚至叫我沽俄鋁去追。佢話,自己做網上節目,好明白啲平台要點,先能吸引到最好嘅內容提供者。佢話做平台嘅映客,就係大陸做得最好嗰間。
當唔識大陸網嘅我,笑佢呢啲公司冇盈利,佢好激動咁捉住我件衫領,叫我自己睇佢盤數。原來,上次中期業績已開始賺,仲要唔少,仲要增長速度好快。我唔識大陸網,不過好少見心欣咁迫我買一隻。唔知係真朋友,定係要我接火棒?你哋自己盤算我兩友誼有幾堅。
孫柏文
延伸閱讀: 波叔是蘇斯克查?(上)
https://bit.ly/2EfeKGt

10萬蚊 100人分!
星期一至五晚上10點半
《動腦Q》Let's Q the money!
http://bit.ly/2QW8LcI