有吳靄儀（Margaret）坐鎮嘅立法會，似乎寧捨不同，一種有理有節嘅堅定格調，往往令人回味無窮。95年參選立法局法律界，至2012年卸下議員身份後，Margaret改當觀察員角色，繼續喺香港嘅法治防線「站崗」，每見不平都拔「法」相助，協助港人保留最重要嘅核心價值，好似最近嘅高鐵一地兩檢爭議，Margaret都寫咗唔少文章，解構呢個人大「決定」帶嚟幾大破壞。

最近Margaret總結咗18年政壇路嘅經歷，出版首部回憶錄《拱心石下 ─ 從政十八年》，以旁觀者身份，自述從政時作為當局者嘅經歷，見證香港20年來政治同法治嘅興衰轉變，將回歸前後香港喺民主進程同法治建設嘅重大事件，留下春秋紀錄。

回憶錄取名「拱心石下」，極有意義，因為立法會拱門頂中央嗰塊梯形楔石，必須不偏不倚，分量十足，先能抵住左右兩方勢力夾攻，將壓力卸回圓拱，否則整道拱門就會塌下，所以佢係將不同立場石塊團結起來嘅中介，而喺拱心石下仰望，就是仰望呢片維繫和諧大力嘅理想位置。回憶錄7月出版，預訂會有8折優惠同作者簽名，詳情稍後公佈。