李八方online︱傳容海恩移民美國？
蘋果日報 2020/12/26 19:48
李八方online容海恩移民美國
尋日有YouTube頻道傳新民黨容海恩要移民去美國，容海恩立即喺Facebook出po話「多謝網民咁睇得起我」。
呢一年好多香港人都移民，不過連建制派有頭有面嘅人都移民就比較少聽。尋日有YouTube頻道傳新民黨容海恩要移民去美國，跟住仲有人發起白宮聯署，要求阻止容海恩移民。容海恩都算反應快，立即喺Facebook出po話「多謝網民咁睇得起我」。
自從有傳容海恩要移民之後，連登亦有網民出po，質疑唔怪得之近排容海恩靜咗咁多，仲話容海恩身為立法會直選議員，唔可以有外國國籍，理應被DQ，甚至有違《國安法》之嫌云云。
唔少網民都好似唔捨得容海恩咁，大叫「不要讓她跑掉」，甚至有人發起白宮聯署，希望禁止容海恩以任何形式移民美國。
討論越演越烈，容海恩終於喺fb出聲話自己無申請移民美國，亦無興趣申請移民，認為謠言止於智者，順便多謝網民咁睇得起佢，搞個白宮聯署咁嘅大龍鳳。跟住亦有網民回帶返今年11月，容海恩上港台《視點31》時講過，讀電腦出身嘅佢有興趣返大灣區發展喎。
容海恩仲同八方講，其實佢而家正準備緊參與第一屆粵港澳大灣區律師執業考試，成個假期都忙於溫習，身先士卒參與國家發展，「點睇都唔似移民喇？」對於今次被人傳移民去美國，佢形容自己都一頭霧水，係今朝黨友同佢講先知，又重申自己留港發展，唔使勞師動眾聯署反對佢移民。
有傳容海恩移民美國，容海恩就話多謝網民咁睇得起佢，佢無興趣移民。容海恩Facebook專頁截圖
有人仲發起白宮聯署，要求美國禁止容海恩以一切形式移民美國。白宮聯署網頁截圖
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！