湯怡(Kathy)同彭秀慧噚晚去到九展E-Max出席電影《大黃蜂》首映禮，湯怡月前宣佈同拍拖11年嘅洪卓立分手，今年聖誕單身度過，湯怡話：「第一年同朋友過，相信一樣開心，唔會lonely(孤獨)，有好多地方想去，咁耐都冇影過聖誕燈飾，會約埋一班朋友着埋同款唔同色嘅衫一齊影相。」

湯怡表示暫時唔會諗開展感情，會專注工作，下月開拍新劇。對於聖誕節會唔會畀多啲機會自己認識異性，佢話：「未咁快認識新朋友。」問到係唔係仍未放低舊情，佢直言：「相信咁多年，唔係一下子可以放低。」對於有冇打畀洪卓立，佢話：「我哋不嬲都係朋友，知佢會開音樂會，今次喺內地開，等佢返香港開再去捧場。」湯怡指自己係一個慢熱嘅人，唔了解深係唔會同人有進一步發展，唔單止拍拖，就做朋友、同事都係，但佢話其實自己係一個好熱情嘅人，同佢相處過嘅人就會知道。

精選娛聞，喺晒《娛果》
http://fb.com/appledailyent