民以食為天，港人也是出了名的為食，造就食材市場的無限商機。阿聰（何智聰）在10年創立Ocean Three，以網上外賣生蠔起家，其後發展成為售賣刺身、急凍海鮮、肉類等多種類的食材店。現時Ocean Three已有7間分店，包括零售及批發業務，阿聰表示前線員工難以請人，但公司會不斷擴展，需要聘請前線員工幫忙。阿聰表示除了價廉物美的食材外，常與顧客接觸的店務員，也是留住客人的關鍵，他認為具有良好的學習態度、主動及有笑容等特質，會有助店務員的工作表現，提升到公司的專業形象。

Ocean Three是專賣生蠔及海鮮凍肉的食材店，創辦人阿聰負責管理公司內近100名員工，同時負責公司的業務發展，阿聰表示現時店務員難請人，「20個人話嚟見工，得10個會真係出現，然後只請到3個人，但最後可能得1個會喺返工時出現。現在我哋嘅業務擴充緊，需要聘請店務員嚟幫手。」店務員的職責包括執貨、點貨、開蠔、銷售及店鋪清潔等，阿聰表示店務員要有好的表現，需要以下的特質：

1. 良好學習態度
阿聰表示店務員需要向客人介紹不同的食材資訊，要記熟資料，有良好的學習態度十分重要，「店務員要熟悉店內唔同商品嘅賣點，例如產地、口感及烹調方法等，能夠詳細回答客人嘅詢問，可以顯得我哋更專業。我哋不時會推出新嘅商品，所以店務員要肯學，不斷吸收新資訊。」

2. 主動及有笑容
阿聰認為店務員能夠主動及有笑容，能給客人留下好的形象，「當客人步入店內，除咗要主動招呼外，見到有貨架亂咗，或雪櫃門有污積，店務員都要主動整理及清潔，保持店鋪整潔，有好嘅形象畀到客人；另外，保持笑容，會畀到客人親切感。」

金融海嘯迫使創業
中五畢業後，阿聰報讀了建造業訓練局的課程，然後便到地盤工作，同時攻讀夜校考取大學學位。07年發生金融海嘯，當時阿聰任職地盤管工，認為公司前景不明朗，故他嘗試創業，「經濟唔好，公司cut預算，升職加薪唔使諗，自己想搵多啲，於是同朋友去搞生意。初時喺eBay開網店，賣內地商品，但冇耐網店愈開愈多，加上全體一球化，容易上網買到內地嘅產品，做網店冇乜利潤，惟有諗發展其他生意。」

其後阿聰嘗試做海鮮貿易，中間經歷投資失利，反而令他發展新事業，「之後搵到門路，可將海鮮批發到內地，初時搵到食肆要貨，以為順利，點知後尾佢哋唔找數，搞到蝕晒啲錢。當時見自己手上仲有啲貨，要諗方法散晒佢，喺facebook開個專頁上載海鮮食品相，周圍tag朋友搵人要。初時散加拿大象拔蚌、登格斯蟹，生意都麻麻，之後到生蠔，因為要散貨所以定價比市價低，估唔到好受歡迎，令我知道生蠔嘅市場利潤唔錯，就開始發展生蠔外賣服務。」

租雪櫃做生蠔外賣
10年，阿聰與拍擋一同成立Ocean Three，租雪櫃擺放生蠔做外賣，「當時自己落手落腳去做，攞貨、出車送貨、銷售、宣傳及客戶服務等都係一腳踢，每日至少做14個鐘，生意增長好快。記得開咗業幾個月就撞正聖誕節，12月嘅生意額有成80萬，雖然之後冇咁誇張，但發展尚算順利。」

雖然以網店起家，但阿聰在聽取客人意見後，決定在11年開設實體店，同時增加食材種類，「每張訂單完成後，我都會問番客人嘅意見，客人反映想有實體店，可以親身挑選食材，於是我哋11年喺葵興工廈內開咗第一間店，開鋪時又唔想店內只得生蠔咁單調，就跟客人嘅意見，引入甜蝦、八爪魚仔及三文魚刺身等不同食材，到現在已經有牛扒、龍蝦、帶子、毛蟹等8百多款。」

兼營批發生意
15年，網上銷售海鮮凍肉食材的競爭漸趨激烈，阿聰認為競爭對手不只存在敵對關係，還可成為合作伙伴，一同擴充市場，於是發展起批發生意。「當時我哋直接喺外國拎貨，加上入貨量夠大，來貨價會較低，我哋就與同行傾合作，批貨畀佢哋；之後仲批貨畀餐廳、酒店，現時批發業務佔生意嘅2成。」

現時Ocean Three有7間分店，阿聰表示需要調整公司的發展方向，以令業務保持增長，「2年前，我哋開始將門市由樓上鋪變做地鋪，同時開喺街市附近，以前會係大時大節先多生意，生意時好時壞，現在方便到家庭客嚟買食材，生意穩定咗。另外，近年客人較注重健康，我哋代理埋泰國嘅無激素雞扒、雞翼及雞脾，遲啲會引進埋無激素嘅豬，及唔同嘅健康類食材。」

後記︰學到嘢
在訪問阿聰期間，得知他現時正受雜誌邀請以主持身分，訪問不同本地公司的老闆，與記者的工作相類似。阿聰說︰「每次訪問都好好玩，可以與唔同嘅老闆傾生意經，聽佢哋分享故事，學到唔少嘢。」看到阿聰表現出的熱情，也感染到記者，令職業倦怠的症狀有所減退，希望每次訪問都是有趣的人，令工作更有趣味。

搵好工，即上 http://www.ecjobs.com.hk