現年38歲嘅《鬼怪》韓國男神孔劉，噚日三度襲台，今日就喺台灣出席代言手機活動，喺現場冧爆千名粉絲。孔劉一出場即以標準中文講：「大家好，我是ZenFone5代言人孔劉。」即時令台下粉絲尖叫不已，不過由於現場太熱關係，令孔劉都不斷流汗，一個鐘頭內換咗三次衫。

孔劉一出場時身穿水藍色恤衫配白褲出場，被司儀黃子佼寸佢天氣咁熱着咁多，孔劉就解釋因為聽說現場冷氣好凍，所以就着上長袖衫，點知活動進行咗半小時後，孔劉就喊熱，全場粉絲好興奮，孔劉即解開一顆扣子，露出胸膛，引誘到粉絲尖叫不停，不過佢又即怕醜得將釦子扣返好。

黃子佼見孔劉滿頭大汗，於是就問粉絲可唔可以等孔劉去換衫，點知佢再度出場見衫同第一件差不多，佢即解釋兩件恤衫嘅質地係唔同。黃子佼爆料指佢喺後台脫掉上衣擦汗，孔劉聽完又怕醜話：「噢…...呢個畫面，可能比大家想像嘅更加唔好睇，我唔想妨礙大家嘅想像。」之後因為要同粉絲近距離接觸，又有擊掌同攬攬，所以孔劉又再次換了件短袖衫才出場。

今次活動除咗台灣粉絲外，亦有來自泰國粉絲，泰國方面亦同時進行直播，黃子佼要佢用泰文打招呼，孔劉就簡易講咗句，不過其他就唔識講，佢承諾之後會好好練習泰文。

而孔劉喺活動最後再次道歉：「中間因為流汗去換咗好多次衫，真係好抱歉。」而孔劉下月10號將滿39歲，現身粉絲就率先同佢慶祝，仲一齊獻唱生日歌，令佢大感驚訝。而佢仲拎起長刀切蛋糕，不過要出盡九牛二虎之力先切到蛋糕，引起全場爆笑，同時佢跟台灣習俗許咗兩個願，一個就希望遇到好作品，另一個願望就獻畀現場粉絲：「希望大家都能永遠幸福又健康。」

更多韓流，喺晒《娛果》
http://fb.com/appledailyent