次按危機搞到花旗嗰邊「立立亂」，前晚花旗股市又用呢個藉口調整，不過，呢個係「知道的風險」，所以風險唔喺呢度，而係喺處理嘅方法。花旗嘅通脹有上升壓力，隨時要加息，但係要救樓市，就唔單止唔加得息仲要減息，好矛盾，呢個就係聯儲局嘅「兩難」。
針冇兩頭利，伯南克點可以搵到一樣嘢解決到呢個問題？於是乎佢就好明顯咁採取拖字訣，總之唔加息又唔減息，不過，咁樣又令到美元好弱，通脹可能會升，資金可能會流走，去到某個時候，可能都係迫住要加息，𠵱家花旗就係面對呢啲問題，不過已經有一段時間嘞，其間股市照升，冇乜利好因素支持，不過，啲錢係咁買，咁就自然要升啦，如果呢樣嘢冇改變過，即係話前晚只係搵個藉口調整，好快又會炒番上去。港股昨日下跌，亦只係順勢，亦好快會掉頭上試23000，要留意嘅股票都係「六行三保」。

中行C輪4832：中行（3988）昨收4.31元，「十字胎」收市，等個市穩番啲，可以即刻炒上，推向5元，可以買啲中行C輪4832，昨收54仙，有效槓桿率6.6倍，正股升上5元，4832會喺1.17元樓上，正股跌穿4.15元止蝕。
俊樺