當年今日
關於我們

【李八方online】陳健民、劉小麗、何啟明係三代同堂?

蘋果日報 2018/09/18 15:50

陳健民何啟明劉小麗

如果問大家一講起劉小麗同民協何啟明會諗起啲乜,答案好可能係立法會九西補選,但若果加埋「佔中三子」之一嘅陳健民又點呢?八方嘅答案係三代同堂。
陳健民今日喺fb登出日前喺一個活動中嘅合照,仲留言話「何啟明說小麗是他老師,小麗老師說我是她老師」,換言之何啟明咪可以叫聲陳健民做「師公」?
八方問過小麗,佢話當年陳健民教過佢集體行為、社會問題等社會學課程,仲係佢嘅博士論文導師之一。小麗話,陳健民畀分唔算緊嘅,不過功課多,之但係啲功課係相當有趣,譬如叫佢去深水埗落區、訪問邊青等等,都係以活動形式進行,令佢學到嘅嘢係理論同現實兼備。
陳健民嘅教學手法,直接影響咗小麗將來、間接影響埋何啟明。因為小麗話佢喺陳健民身上學到對學生要深入淺出。對於啟明,小麗十分記得,因為啟明係佢第一年喺理大教副學士時嘅學生,當時佢就教啟明有關性別嘅議題,仲好記得啟明係一個識問問題嘅學生添。
啟明就同八方講,小麗係一位親切友善嘅老師,佢最深印象就係試過著住套校服裙返學,因為當日嘅題目係講跳出框框。唔想,啟明即刻搵埋張相畀八方睇添呀﹗果然真係相當跳出框框。
empty
(右)何啟明身穿校裙。何啟明提供圖片