港深兩地即將二十四小時通關，好多人都擔心港人湧去深圳買樓，拖冧新界樓市。但係美聯粉嶺帝庭軒分行經理胡建業對蘭西講，該公司近排見到，唔少手持中國護照嘅內地人士，查詢買香港樓，差唔多有兩成。佢哋詢問新界八百到一千方呎單位價錢，對屋苑盤興趣較大。部份重會問市區屋苑及近排廣告賣得多嘅新盤資料。
胡建業話，美記啱啱促成一單內地客入市。佢喺深圳已經有樓，因要港深兩邊走，貪方便，有個地方歇腳，好過租酒店，所以用百六萬買咗粉嶺御庭軒單位。
個客當初喺附近搭車，順便問吓香港個樓市點樣。睇咗御庭軒三次至落槌。原本諗住買一千呎，但冇銀行接受佢嘅按揭申請，要一次過畀晒錢，惟有買間細嘅。
胡建業透露，呢班內地客多數用本票或者禮券找數，首期就多數畀現金。聽講曾經有個客，真係成袋銀紙攞落嚟買樓。

買貝沙灣有名車遊艇坐
為咗向貝沙灣住客提供一個本港前所未有嘅會所，電盈基建主席李智康嘅小宇宙相信已發揮到極限。噚日佢帶同記者親身體驗佢精心炮製嘅"DreamCarClub"同"YachtClub"。
"DreamCarClub"轎車隊包括勞斯萊斯、林寶堅尼、平治、積架同保時捷等，並提供五星級酒店水準嘅司機服務。"YachtClub"就係會所會起一個私人遊艇碼頭，重有一艘命名Bel-Air嘅遊艇。