財經名嘴鄧聲興踏入兔年雙喜臨門，結婚兼轉工。鄧聲興噚日正式通知親朋戚友，下個月8號同拍拖兩年幾嘅女友Maggie拉埋天窗，喺九龍站W酒店行禮兼擺酒。嗰日係大年初六，星期二，大家可以收市之後就去飲。
華華噚日打電話恭喜鄧聲興，佢笑到合不攏嘴，開心到不得了，佢仲呻話，W酒店嘅宴會廳最多擺到20圍，佢哋兩口子交遊廣闊，家度緊最終要擺幾多圍，但係一班財經名嘴朋友就一定唔少得。

再娶老婆兼過檔尚乘

佢估計，今次籌辦婚禮嘅使費大約30至40萬蚊，主要用喺酒席、婚紗同禮服上，冇花錢影結婚相，打算等到結婚當日外影就算，成件事簡單而隆重。
至於點解揀2月8號，佢唔知講真定講笑，話因為假期日子完全book唔到場，搵人擇日之後決定揀個平日嘅日子，大家收市、收工後就可以到場。
喜事仲唔止一單，鄧聲興結婚之後就會轉工，去長實（001）旗下尚乘資產出任尚乘資產證券部總經理。佢話，因為交接嘅問題，暫時未定實幾時過檔去尚乘，估計大約在結婚之後，去埋honeymoon返嚟就會返新工。簡單嚟講，兔年伊始，佢就有兩個新開始，第二次做人老公兼跟誠哥搵食嘞！

李華華
mailto:[email protected]