八方噚日寫到,三名回族同胞星期日在「澳門蛋」外拉橫額祝胡主席萬壽無疆,為澳門回歸10周年贈興,隨即被警察帶走,連一位當時冇表露目的嘅港人「塘邊鶴」都走唔甩。
「塘邊鶴」方先生噚日向八方報料,稱當日打算向胡主席跪地請願,爭取內地所生孩子嘅撫養權,可惜未有任何動作就被人帶走。佢話被帶返警署後,同另外五人一齊被扣留;有內地人想交請願信,點知被人即場撕毀。
方先生出師未捷,之後被遞解出境回港,佢話經此一役,會由親共變反共,仲會向聯合國人權委員會投訴。
澳門回歸官方如臨大敵,良民、記者都唔放行,記協上周末出聲明批評澳門做法,據知事後電腦被入侵,噚日要緊急維修。