韓劇《我係金三珣》、《秘密花園》嘅36歲男星玄彬出道15年，近日佢孖韓劇《Doctors》女星朴信惠主演嘅tvN新劇《阿爾罕布拉宮的回憶》於前日首播，劇集首播平均收視有7.507%，最高收視有8.5%，成績十分理想。

《阿爾罕布拉宮的回憶》播出首集後，觀眾反應都有讚冇彈，特別係加入AR遊戲，題材好新穎。而《阿爾罕》播出後亦令玄彬再次成為網上熱門人物，而玄彬昔日嘅酬勞亦成為熱話。

玄彬於2003年因出演《Nonstop4》於螢幕正式出道，過去曾有韓媒提及玄彬喺出演《Nonstop4》時片酬為25萬韓圜(約1,750港元)一集左右，不過因為當時劇集為日日劇，長達251集，計返條數玄彬當年都穩袋成40幾萬港元，之後到2005年玄彬已擔正做《我係金三珣》男主角，劇集當年收視破50%，被封為「國民電視劇」，同時亦令玄彬成為一線明星，酬勞亦開始十級跳。

到2010年嘅《秘密花園》玄彬再創事業高峯，2011年玄彬入伍兩年後於翌年12月退伍，退伍後玄彬於2015年攜新作《海德哲基爾與我》回歸公仔箱，由於事隔多年再拍劇，所以當年有韓媒報道玄彬劇酬高達1億韓圜(約700萬港元)，酬勞比初出道時升咗250倍。不過今次拍《阿爾罕》，韓媒就冇報道佢嘅劇酬，估計事隔三年再拍劇嘅玄彬劇酬將會再加碼。

精選韓流，喺晒《娛果》
http://fb.com/appledailyent