話咁快又到○六年，時間過得真快，「○七、○八」已經唔再係口號，而係好快就殺到埋身嘅現實，嗌咗咁多年雙普選，下一年已經係○七年，但民主前路依然好似個迷宮，人大釋完法後煲呔又帶住大家兜兜轉轉，爭取咁耐連時間表都冇個，真係幾令人沮喪心淡。
好彩香港重有一班人，雖然用咗廿幾年青春、屢敗屢戰，仍然未放棄爭取民主。好似「社福界長毛」張超雄咁，新年伊始，佢話民主運動一定係靠人民，佢對香港人重有寄望，新年願望係香港人嚟緊呢年多啲運動，上多幾次街幫手爭取，7.1記住行埋出嚟，寓減肥於爭取民主，唔好放棄！
正牌「長毛」梁國雄重樂觀，佢同八方講○六年係「大好形勢」，因為原地踏步係違反《基本法》嘅，佢會繼續爭取政府搞公投，到時政府同左派連簽名活動都慳番唔使搞，希望立法會主席范太早日批准佢提嘅全民公投法。

馬丁期望廢除公司票

「民主阿伯」馬丁就話，○六年一定唔會放軟手腳，佢哋會爭取廢除功能組別嘅公司票，迫政府做多啲嘢，唔可以原地踏步。忙於組黨嘅正牌「民主女神」余若薇就梗係想A45順利組黨啦，希望多啲人肯好似關信基教授，挺身而出參與政黨活動，唔好成日覺得入黨唔好；佢認為政府要取消區議會委任制，因為民意已經好清晰，唔可以好似鴕鳥咁。

傑哥堅信冷靜期快過

而梁家傑就話，喺新一年會繼續爭取二○一二普選，絕對唔會輕言放棄，當然呢排可能要進入冷靜期，中央唔會即刻同泛民溝通，但係佢有信心中央唔會關上門，否則會激化爭取民主運動，對北京重冇好處。至於做咗民主溫和派嘅石哥就話，民主派有需要討論吓策略，睇吓點樣面對呢個局面，但如果要民主繼續向前走，始終要諗吓點同北京維持溝通互信喎。
民主黨主席達仔就對煲呔重有啲信心，覺得煲呔休息吓、落咗道火之後，就會繼續同民主派溝通；總之年年keep住7.1上街，一定可以爭取到普選時間表！

傳真︰2623-9278
電郵︰[email protected]