QQ騰訊（700）近排股價勁到飛起，但點都唔及老闆馬化騰派利是誇張。事緣禮拜一馬生朝早10點半開始派利是，有網民喺微博發文兼有相為證。有錢派，萬人響應，氣勢直迫古時朝臣爭住向皇上道賀嗰條人龍！

每封50蚊　共派50萬

「有圖有真相。」網民見到咁壯觀嘅場面紛紛轉發，喺微博2個鐘轉發超過1000條，直播呢件事。有員工話喺寒風中等咗一個鐘，「排隊的都在外面，由一樓一直排到37樓，從10點派到12點，小馬哥派到手軟。」據聞有6位高層派利是，每封50蚊人仔，每人合共得300蚊人仔。
騰訊就話，以前高層會向全體員工派開工利是，呢個係公司傳統，今年陣容強勁，至少有幾千人。去年騰訊有近1.3萬名員工，大部份喺深圳返工，當打個8折，就有成萬人咗利是，馬總自己洗咗50萬人仔，但相比馬總淨人工一年都425萬人仔，真係濕濕碎。不過華華諗唔明，馬總每秒派1封，2個鐘都係派到7200個員工，莫講話祝賀說話，馬總仲要有一對摩打手！
呢個利是文化，有人讚，亦有人質疑係借機炒作。有網民就好「葡萄」地話，「他們應該組織一吓，列成QQ形狀，馬總一高興，初九再發」，有網民就話不如自動過數仲好，華華覺得派利是係希望拎個好意頭啫，過數冇咁爽嘛。

李華華
mailto:[email protected]